Nagresulta sa pagbayluhanay sang mga ideya ang ginhiwat nga committee hearing sang Iloilo City Council natuhoy sa pagpalawig sang 40 porsyento nga reduction sang Real Property Tax sa syudad, matapos ginpunggan si Councilor Sheen Marie Mabilog sa pagpamangkot kag nag-walkout ang pila ka mga konsehal.
Sa interview sang Bombo Radyo kay Councilor Sheen Marie Mabilog, ginpahayag niya nga samtang nagapamangkot siya sa hearing, nakalungan gid siya sang kahigayunan nga magpahayag bangud duha lang ang pamangkot kag duha lang ka follow-up question ang ginatugot.
Suno kay Mabilog, kulang gid ini para matalakay sang husto ang isyu.
Ginsiling man niya nga kun indi ang pamangkot relevant, dapat ini i-point of order, kag indi lang basta hambalon nga para lang sa iya.
Ginpabutyag man ni Mabilog nga suportado niya ang mga diskwento nga pwede mahatag sa publiko, apang kulang pa ang datos nga ginpresentar.
Ginpahayag man nga may nagsiling nga indi man kuno beneficial sa syudad ang Real Property Tax reduction.
Gin-adjourn ang hearing bisan wala pa siya natagaan sang chance nga magpadayon sa pagpamangkot.
Antes pa sini, naguwa na una sanday Councilor Malabor kag Councilor Duron, kag nag-walkout ang pila pa ka konsehal bangud sang tensyon sa sulod sang sesyon.
Ginpangunahan ang hearing ni Councilor Maria Irene Ong bilang chairman sang Committee on Ways and Means, kaupod sanday Councilor Nene Dela Llana kag Councilor Rex Marcus Sarabia.
Yara man ang City Treasurer’s Office, City Assessor’s Office, City Accountant kag City Legal Office.
