“Si Inday Raisa Treñas magaserbisyo sa tanan nga nag-upod, nagbulig, nagboto — kag sa mga wala nagboto. Si Inday Raisa mangin mayor para sa tanan diri sa syudad sang Iloilo.”
Ini ang pasalig ni Raisa Treñas-Chu pila ka adlaw matapos nakuha ang kadalag-an sa 2025 mayoral race sa Iloilo City.
Sa interview sang Bombo Radyo sa mayor-elect nga subang nga anak ni outgoing Mayor Jerry Treñas, ginpahayag sini nga kasubong sang isa ka iloy sa puluy-an, tatapon niya ang iya tanan nga ‘kabataan’ sa syudad.
“Kun iloy ka na sang syudad, indi ka pwede magpili. Para ka gid sa tanan mo nga kabataan sa Iloilo City,” pahayag sini.
Gindugang man sini nga daku gid ang nangin impluwensya sang iya amay agud nga mahulma ang iya ikasarang bilang lider.
Magluwas sa mga natun-an sini sa adlaw-adlaw nga ginapakita sang alkalde, ginbaklan man siya sini ang mga leadership books agud nga madugangan ang iya ihibalo sa pagserbisyo sa publiko.
“Ginhambalan niya [Mayor Jerry] ko nga what you lack in experience and time, you read para mas madamo ka pa gid sang ma-learn,” suno kay Raisa.
Ginpakigbahin man sini ang tatlo sa iya nagapanguna nga prayoridad sa una nga 100 ka adlaw sa iya administrasyon.
Una, pauswagon sini ang mga pangitan-an sang mga Ilonggo, ilabi na kasunod sang nakit-an nga madamo ang job fairs apang gamay lang ang naga-apply.
Suno kay Raisa, may nakit-an ini nga problema sa job matching, gani importante ang courses ukon re-training para nga ma-upscale pa ang workforce sa syudad.
Ang ikaduha amo ang paghatag sang atensyon sa healthcare.
Pahayag sini, pasangkaron niya ang mga serbisyo nga ibutang sa Uswag Mega Health Centers lakip na ang laboratory services, siguraduhon nga accessible ini sa mga pumuluyo, kag butangan man ang kada distrito.
Ikatatlo, ang hatagan sini sang atensyon amo ang edukasyon ilabi na ang pagpadamo sang Uswag scholars nga subong masobra na sa 30,000.
Ginaplano man sini nga magdugang sang Iloilo City Community College – City Proper Campus. Ini bangud sa nakit-an nga problema sa campus sa Molo nga indi na makadugang sang mga program kag estudyante bangud nga ginakulang na sang classrooms.
Mayo 13 sang ginproklamar sang Iloilo City Board of Canvassers ang 39-anyos nga si Treñas-Chu bilang winner sa mayoral elections. Apisar bag-uhan sa pulitika, nakuha sini ang landslide win nga may 170,162 votes, ukon 69.37 percent, kun sa diin ginlutos sini ang isahanon nga kasumpong nga si Roland Magahin, nga nakakuha sang 75,139 votes, ukon 30.63 percent.#
