DUMANGAS, ILOILO – Gin-athag ni Rev. Fr. Juan Parreñas, kura paroko sang Saint Augustine Catholic Parish Church sa Dumangas, Iloilo, nga wala sang malisya ang iya nangin reaksyon sa ginapahayag pagpalayas niya sa pamilya sang minatay nga ginmisahan sa nasambit nga simbahan.
Sa labing una nga kahigayunan, naghatag sang iya sabat si Parreñas kadungan sang misa sa Saint Augustine Catholic Parish Church, kun ano gid ang natabo sang adlaw nga ginmisahan ang minatay nga si Punong Barangay Ananias “Tatay Ane” Poblador.
Suno kay Parreñas, indi matuod nga iya ginpalayas ang pamilya Poblador bangud nga sa pagkamatuod, naatrasar ang oras sang bunyag bangud nga tuman ka lawig ang tion nga ginhatag para sa picture taking sang pamilya sang minatay.
Ginpahayag ni Parreñas nga iya nga ginhingyo sa emcee nga tapuson na ang picture taking apang may grupo sa gihapon nga nagpatunga agud nga magpakuha sang laragway.
Sa pagkamatuod suno sa Kura Paroko, iya nakita nga daw kasubong nga nagapaganot ang pamilya nga magguwa sa simbahan tubtub nga iya ginsenyasan ang photographer nga mag-untat na.
▶▶Pamilya Poblador, ginbali ang pahayag sang kura paroko sang Dumangas, Iloilo may kaangtanan sa kontrobersiya nga natabo
Mahimo suno sa pari nga ginhatagan sang malisya ang iya nga pagsenyas tubtub nga nag-umpisa na ang bunyag kag samtang, siya ang nagawali, hinali lang nga may nagdisturbo sa seremonya kag ulihi na lang niya nahibalu-an nga ang nasambit nga persona ang himata sang napatay nga Punong Barangay.
Nagpamalibad naman si Parreñas nga magsabat sa mga pamangkot bangud suno sa iya, maathag nga wala siya sang may ginpalayas sa sulod sang simbahan.
Sa pihak sang natabo, ginpahayag sang natungdan nga kun tani, mauntat na ang kontrobersiya bangud nga nagpangayo na sang pasaylo ang pamilya sang minatay.
Nagalaum naman ang Ministry of Lectors and Commentators nga mauntat na ang nasambit nga kontrobersiya.
Suno kay Gabriela Mae Juyanan, miyembro sang Ministry of Lectors and Commentators sa nasambit nga parokya, nagasimpatiya siya kay Parreñas nga nagpabilin nga kalmado sa pihak sang pagpangyaguta nga nabaton.
Ginpahayag ni Juyanan nga maayo ang nangin lihok ni Parreñas nga pagpangayo sang pasaylo sa pamilya.
