Indi basta-basta nga mga kunsekwensya ang atubangon sang mga tawo nga madakpan nga may kaangtanan sa iligal nga droga.
Apang paano abi kun ang madakpan indi tawo?
Sa Pococi, Costa Rica, arestado ang isa ka kuring bangud sa krimen nga pagdala sang illegal drugs sa sulod sang presuhan.
Nagduda ang mga opisyal sa Pococi Penitentiary sang nakit-an ang kuring nga nagalakat-lakat kag may nakaputos nga tela sa iya lawas.
Gingunting nila ang tela kag didto nakit-an ang mga pakete sang marijuana, 70 gramos sang cocaine paste, kag duha ka papel nga ginagamit nga drug paraphernalia.
Ginbansagan ang kuring nga si “Narcomishi,” ukon “Narco Kitten,” kag sang ulihi gintugyan ini sa National Animal Health Service (SENASA).
Ginpasalig sang awtoridad nga maayo ang pagtatap sang pasilidad sa kuring apisar pa nga may record ini sa illegal drugs.
Sandig sa otoridad, may nauna na sila na-encounter nga kaso sang 2018 kun sa diin kuring man ang nadakpan nga magpalusot sang mga kontrabando.
Sang amo nga tuig, ang ginpadala sa kuring amo ang earphone, charger, kag cellphone nga may yara pa sang extra battery nga ginalantaw tuyo nga ipagamit sa preso.
