Nagapati ka bala nga may siyam ka kabuhi ang mga kuring?
Lantawa ini nga video sang isa ka kuring sa Cebu City nga naglumpat halin sa 18th floor sang isa ka building sa Barangay Labangon.
Ginapahayag nga nagtawag ang mga residente sang rescuers agud ma-luwas ang isa ka kuring nga yara sa ledge sang isa ka condominium sa amo nga barangay.
Pag-abot sang City Animal Disaster Rescue Team, makit-an gid kun ano ang ila paghinay-hinay kag pag-halong agud nga mabutang sa net ang pobre nga kuring. Pero sa baylo nga mag-kooperar kag magsulod sa net, sa kakibot sang tanan, naglumpat ini halin sa iya ginapungkuan!
Halin sa ika-18 nga panalgan, nagtupa ini sa atop sang second floor, kag mapati ka kag sa indi, buhi ini gihapon!
Gilayon nga gindala ang kuring sa veterinarian agud nga ma-check. Safe na ini subong apang magapabilin anay sa doktor para sa dugang nga obserbasyon.##
