ILOILO CITY – Ginpasiguro sang gobyerno sang Kuwait nga ihatag sa labing madali nga panahon ang hustisya para kay Joanna Daniela Demafelis, ang Ilongga OFW nga ginpatay sang iya mga amo sa Kuwait kag ginsulod sa freezer.
Sa interview sang Bombo Radyo Iloilo, ginpahayag ni Philippine Ambassador to Kuwait Renato Pedro Villa nga nagpakig-angot ini sa mga prosecutors nga naga-uyat sa kaso ni Demafelis, kun sa diin ginpasiguro sang mga ini nga indi maglab-ot sa isa ka tuig kag masentensiyahan ang mga suspek nga sanday Nader Essam Assaf kag Mona Hassoun.
Suno kay Ambassador Villa, sa kadamo sang ebidensiya batok sa mag-asawa, nagpabutyag ang mga prosecutors nga posible silot nga kamatayon ang ipatuman batok sa mga amo ni Joanna.
Una na ginpasiguro sang Kuwait nga apisar indi mabalik sa pungsod ang mga suspek, magapatigayon ang mga ini sang trial in absencia kag diri mas mapadali ang pagpanaog sang silot.
Paathag sang Philippine envoy, kun trial in absencia, wala na sang kahigayunan ang mga akusado nga magsabat kag gilayon ang mga ini nga sentensiyahan, santu sa ebidensiya.
Nahibaluan nga sa kustodiya karon sang Lebanon ang amo nga lalaki ni Joanna samtang nagapabilin naman sa Syria ang babaye.
Suno kay Ambassador Villa, wala pa sang abiso ang Lebanon nga ila ma-extradite si Assaf samtang nabudlayan naman ang Kuwait nga mapabalik ang amo nga babaye bangud sang kinagamo karon sa Syria.