Kuwait magapatigayon sang trial in absencia kun indi mapabalik ang mga amo sang napatay nga Ilongga OFW

ILOILO CITY – Ginpasiguro sang Kuwait nga dayunon ang trial batok sa mga amo sang Ilongga OFW nga si Joanna Daniela Demafiles, pananglitan indi makabalik sa Kuwait ang mag-asawa.

Nahibaluan nga yara karon sa kustodiya sang mga otoridad sa Lebanon si Nader Essam Assaf samtang nagapabilin naman sa kustodiya sang mga otoridad sa Syria ang asawa sini nga si Mona Hassoun.

Sa interview sang Bombo Radyo, ginpahayag ni Philippine Ambassador to Kuwait Renato Pedro Villa nga santu sa iya pagpakig-angot sa mga prosecutors nga naga-uyat sa kaso ni Demafelis, nakapadala na ang mga ini sang sulat sa Interpol para sa extradition sang mag-asawa pabalik sa Kuwait.

Apang nabudlayan ang Kuwait sa pagpabalik sa amo nga babaye ni Joanna bangud sang kinagamo subong sa Syria.

Sa pihak sini, ginpahayag ni Ambassador Villa nga magahiwat sang trial in absencia ang Kuwait apisar indi makabalik ang mag-asawa.

Sa trial in absencia suno kay Villa, mas mapadali ang pagpanaog sang Kuwait sang silot batok sa mag-asawa nga mga amo ni Joanna Demafelis.