ILOILO CITY – Indi makaabot subong nga adlaw sa pungsod ang mga tiglawas sang Kuwait nga magapakigsapol para sa ginaluto nga kasugtanan nga nagatuyo mahatagan proteksyon sang mga overseas Filipino workers (OFW) sa nasambit nga pungsod.
Sa interview sang Bombo Radyo Iloilo, ginpahayag ni Philippine Ambassador to Kuwait Renato Pedro Villa nga wala pa ma-schedule kun san-o magapadulong sa Pilipinas ang delegasyon sang Kuwait.
Suno kay Villa, subong nga adlaw pa siya magapakigsapol sa Ministry of Foreign Affairs sang Kuwait agud italana kun san-o magapadulong sa Pilipinas ang mga opisyal sang Kuwait.
Hingyuon sang Philippine envoy sa Kuwait nga sa Pilipinas hiwaton ang una nga pagsinapol sa Memorandum of Understanding.
Apang determinado suno sa opisyal ang magtimbang nga bahin nga pirmahan ang kasugtanan.
Nagapati man ang ambassador nga ihatag sang Kuwait ang hingyo sang Pilipinas nga dapat ang embahada ang naga-uyat sang passport kag visa sang mga OFW kag pasugtan ang mga ini nga maggamit sang cellphone agud makapalab-ot sang reklamo sa embahada kun ginamaltrato sang ila mga employer.