ILOILO CITY – Ginpasiguro ni Iloilo City Mayor Jed Patrick Mabilog nga wala sang dirty money nga gingamit sa pagpatindog sang iya puluy-an nga ginatawag ni Presidente Rodrigo Duterte nga daw kaangay sang palasyo.
Sabat ini sang alkalde sa ginpahyag sang Presidente nga iya na ginmando ang lifestyle check sa alkalde sang siyudad.
Suno kay Mabilog, wala siya sang dapat taguon kag baliskad sa pagpati sang Presidente, indi palasyo ang iya puluy-an.
Sa pagkamatuod suno kay Mabilog, iya ini ginbuksan sa media sang nakaligad nga tuig agud makita ang iya balay.
Antes pa man suno sa alkalde nga nagsulod siya sa pulitika, may mga negosyo na sila sang iya misis nga si Marivic.
Ginpahayag ni Mabilog nga isa na siya ka negosyante sa Manila antes nagdesisyon nga permanente na nga magpuyo sa Iloilo kag magsulod sa pulitika.
Indi kaangay sang iban nga pulitiko suno kay Mabilog, wala siya nagmanggaran sa posisyon.
Ginpanindugan ni Mabilog nga antes siya magsulod sa pulitika may pila na sila ka mga negosyo sang asawa nga si Marivic.
Suno kay Mabilog, negosyante na siya sa Manila antes ini nagdesisyon nga permanente na magsaylo sa Iloilo kag magsulod sa pulitika.
Pila ka tuig nga nagtrabaho ang iya misis sa Canada para makasupot kag ila ginbutang sa investment, suno sa alkalde.
Apang sa karon suno kay Mabilog, wala siya maghuna-huna nga ang handum niya nga makapatindog sang balay ang mangin mitsa sang iya bangungot.
Ang puluy-an ni Mayor Mabilog ang makita sa Barangay Tap-oc, Molo, Iloilo City kag tatlo ini ka panalgan na nagaatubang sa Iloilo River.
Nangin kontrobersiyal ang nasambit nga puluy-an matapos ginreklamo sa Ombudsman bangud nga gindeklarar ni Mayor Mabilog nga ini ang nagabalor sang P3 million apang suno sa mga kritiko, nagalab-ot ini sang P50-70 million.