LOS ANGELES COUNTY – Ginpa-idalom na sa state of emergency ang Los Angeles County bangud sa maggamo nga hublag protesta nga nagakatabo subong sa Estados Unidos.
Ini ang may kaangtanan sa pagkapatay sang black american nga si George Floyd sa kamot sang isa ka police officer sa Minneapolis.
Sa report ni Bombo International Correspondent Dr. John Tacapan direkta sa L.A County, iya ginpahayag nga gindeklara mismo ni California Governor Gavin Newsom nga ipa idalom ang Los Angeles County sa state of emergency sa diin nag deploy na sang mga katapo sang National Guard agud nga mabuligan ang pagpugong sa mga raliyista.
Suno kay Tacapan, indi lamang normal nga hublag protesta ang ginahimo sang mga tawo kundi naga pang-vandalize ang mga ini sang pader sang establisimento, naga pang ransack kag nagabato sa mga otoridad.
Sa paglantaw niya, indi lang protesta ang ginahimo sang mga raliyista kag mahimo nga may madalom pa gid ini nga mga rason kun ngaa naga-gamu subong ang Estados Unidos.
Pahayag niya, sa pagkamatuod, indi lang mga black american ang naga intra sa hublag protesta kundi may yara man sang iban nga white american nga nakig-bahin
Dugang pa sang natungdan, sa nagakatabo subong sa nasambit nga pungsod, wala siya sang may nakit-an nga mga Filipino nga naga intra sa amo nga kinagamo.
