Amat-amat na nga nagakalikop ang mga areas sa bilog nga probinsya sang Iloilo ang prone sa pagbaha kun magmunog ang bubo sang ulan.
Ini ang pahanumdom sang Provincial Disaster Risk Reduction and Management Office (PDRRMO) kadungan sang forecast sang Philippine Atmospheric Geophysical and Astronomical Services Administration (PAGASA) nga posible maumpisa na sa bulan sang Oktubre ang La Niña.
Sandig sa anunsyo sang PAGASA, mangin “above normal” ang rainfall condition sa pila ka bahin sang pungsod sa amo nga bulan.
Lakip sa ginalantaw nga may amo sini nga rainfall condition amo ang National Capital Region, Central Luzon, Southern Luzon, Eastern Visayas, Caraga, parte sang Cagayan Valley, kag Western ukon Central Visayas.
Sa interview sang Bombo Radyo kay Dr. Jerry Bionat, head sang PDRRMO, iya ginpahayag nga sang una, ginakabig nga high-risk sa mga baha ang mga lugar nga malapit sa kasubaan, apang sa subong, pati ang iban nga mga banwa kag mga syudad ang ginasul-ob naman sang tubig-baha.
Ang labi nga dapat mag-aligmat suno sa natungdan amo ang yara sa agricultural sector nga amo ang una nga mahalitan sang La Niña kag magaresulta pati sa economic loss kun matam-an ang halit sa mga pananum.
Apisar indi man mapunggan sang development infrastructure projects ang halit dulot sang sini nga mga baha, importante gihapon suno kay Bionat nga ulikdon sang local government units ang pagtukod sang maayo nga drainage systems agud mahagan-hagan man ang perwisyo nga idulot sang tubig-baha sa mga pumuluyo.
Subong nga ginpangsemento na ang dalan kag ginapanghimo nga subdivision ang mga katalamnanan, importante nga husto ang engineering design suno kay Bionat agud nga may agyan ang tubig.
