ILOILO CITY- Wala pa sang persons of interest ang otoridad may kaangtanan sa kamatayon sang tricycle driver nga nasapwan nga wala na sang kabuhi sa kahilamunan sa Banuyao, La Paz, Iloilo City.
Ang biktima amo si Ronnie Suficiencia, residente sang McArthur, La Paz.
Sa interview sang Bombo Radyo kay PLt. Greg Matutino, Officer in Charge sang La Paz Police Station, iya ginpahayag nga sa subong ginaisa-isa nila kun sin-o ang kaupod sang biktima antes natabo ang krimen.
Suno kay Matutino, dako ang posibilidad nga kakilala man lang ni Suficiencia ang nangamot sa pagpatay sa iya.
Nagapati naman si Matutino nga indi holdup ang mayor nga tuyo sa pagpatay sa biktima, sa baylo, mahimo nga may dumot ukon kaakig sa iya ang sin-o man nga naghimo sang amo nga krimen.
Nahibaluan nga pilas sa ulo ang naagom sang tricycle driver nga ginapatihan agi sang paglampos sang matig- a nga butang.
