[Warning: Sensitibo ang kaundan sang sini nga balita]
Bangkay na sang nasapwan ang isa ka 33-anyos nga labandera nga ginpahayag nga ginhimuslan antes ginpatay sa Brgy. Dos Hermanas, Talisay City, Negros Occidental.
Suno sa impormasyon, Oktubre 8 sang nanglaba sa sapa ang biktima apang wala na ini nakapauli rason nga nagpangayo sang bulig sa kapulisan ang live-in partner sini.
Makaligad ang pila ka adlaw, nag-report sa kapulisan ang duwa ka lalaki nga nagsiling nga may napanimahuan sila nga malangsa nga baho sa sapa.
Didto na nagresponde ang mga pulis kag nakit-an ang bangkay sang biktima nga nasulod sa sako.
Nagduda ang kapulisan sa duwa ka lalaki kun paano nila nakit-an ang bangkay bangud masobra isa ka kilometro ang kalayuon sa sapa sang ila ginaubrahan nga farm.
Didto na ginpaidalom sa interogasyon ang duwa ka lalaki tubtob nga nag-ako sa ginhimo nila nga krimen.
Suno sa mga suspek, gin-utangan nila sang kwarta ang biktima apang wala sila ginpahulam rason nga naakig ang mga ini kag ginplano ang pagpatay sa labandera.
Gin-ako man sang mga suspek nga nakagamit sila sang iligal nga druga sang natabo ang paghimulos nila kag pagpatay sa biktima.
Kaso nga rape with murder ang ginpasaka batok sa mga suspek.
