Makabig nga isa ka maragtason ini nga adlaw, Marso 5, matapos nag-abot na sa Western Visayas ang labing una nga batch sang COVID-19 Vaccines sakay sa Philippine Airlines flight number 2141.
Ang nasambit nga bakuna amo ang masobra 17,000 ka doses sang China-made nga Sinovac vaccines.
Sa interview sang Bombo Radyo kay Dr. Mary Jane Juanico, pinuno sang Infectious Disease Cluster Unit sang Department of Health Region VI, iya ginpahayag nga ihatag ang Sinovac COVID-19 vaccines sa anum ka mga priority hospitals sa Western Visayas.
Duha diri ang sa Bacolod City nga amo ang Corazon Locsin Montelibano Memorial Regional Hospital kag Dr. Pablo O. Torre Memorial Hospital (ukon Riverside Medical Center).
Ang apat naman nga yara sa syudad sang Iloilo amo ang Western Visayas Medical Center, West Visayas State University Medical Center, Iloilo Doctor’s Hospital, kag Iloilo St. Paul’s Hospital.
Suno kay Juanico, 18 boxes ang nag-abot sa Iloilo nga may unod nga ginabanta 6,000 doses sang Sinovac vaccines.
Ang mga bakuna ang iga-roll out sa 8,438 ka mga frontliner kag medical worker sa nasambit nga anom ka ospital sa Western Visayas.
Magaumpisa naman ang inoculation bwas nga adlaw, Marso 6.
Samtang, kun pila na man ka personnel ang yara sa priority hospital amo man ang equivalent nga bakuna nga mabaton.
Indi man mandatory ang vaccination suno kay Juanico gani nagahanda sang quick substitution list ang DOH Region VI.
Ini agud indi mauyang ang doses sang bakuna kag mapasa sa masunod nga priority hospital kun indi ma-consume sang una nga gin-prayoridad nga ospital.
