ILOILO CITY – Ginpasakaan na sang kaso ang punong barangay sang Brgy. Tacas, Jaro, Iloilo City bangud sa ginapahayag maanomaliya nga pagpanghatag sang ayuda sa idalom sang Social Amelioration Program sa ila nga lugar.
Ang nasambit nga opisyal amo si Punong Barangay Joseph Poral sang nasambit nga lugar.
Sa interview sang Bombo Radyo kay Pol Col Gervacio Balmaceda, pinuno sang Criminal Investigation and Detection Group 6, iya ginpahayag nga napasakaan na sang kaso si Poral bangud sa paglapas niya sa RA 3019 ukon Anti Graft and Corrupt Practices Act kag RA 11469 Bayanihan to Heal as One Act.
Suno kay Balmaceda magluwas sa duha ka kaso nga ginpasaka kay Poral pasakaan pa sya sang kaso administratibo bangud sa paglapas niya sa RA6713 ukon amo ang Code of Ethical Standard of a Public Official.
Dugang sang natungdan, suno sa tagreklamo ginkanselar mismo ni Poral ang iya application agud makabaton sang nasambit nga ayuda kag base man sa imbestigasyon nga ginpatigayon sang Criminal Investigation and Detection Group natukiban nga matuod ang pahayag sang tagreklamo.
Santo sa pahayag ni Balmaceda, magluwas kay Poral mahimo man nga mapasakaan sang kaso ang iya secretary kag treasurer.
Nahibaluan nga si Poral ang labing-una nga punong barangay sa syudad sang Iloilo nga napasakaan sang kaso bangud sa anomaliya sa pagpanagtag sang nasambit nga ayuda.
Samtang, handa naman nga atubangon ni Punong Barangay Joseph Poral ang kaso nga ginpasaka batok sa iya.
Sa interview sang Bombo Radyo kay Poral, iya ginpahayag nga wala sya sang ihibalo nga may yara sa pumuluyo niya nga nagpasaka sang kaso batok sa iya may kaangtanan sa pagpanagtag sang nasambit nga ayuda.
Suno kay Poral, wala sya nagakalingkang sa nasambit nga reklamo bangud pat-ud niya nga patas ang iya nangin pagpanghatag sang ayuda sa iya mga kabarangay kag ginasunod lang nila ang pagsulundan nga ginhatag sang Department of Social Welfare and Development.
Gin-ako naman sang natungdan nga indi man madali para sa ila nga mga punong barangay ang pagpatuman sang sistema sang nasambit nga ahensya bangud masami ini nga nagabaylo-baylo.
Dugang sang natungdan, kun sya lang ang pamangkuton luyag man niya nga makabaton sang ayuda ang tanan niya nga mga pumuluyo apang kinahanglan nila sundon ang pagsulundan nga ginhatag sang Department of Social Welfare and Development.
