ILOILO CITY – Ginalauman nga ginatos ka bikers ang maga-upod sa labing una nga “Tour of the Fireflies” nga pagahiwaton sa syudad sang Iloilo.
Sa Good Morning Philippines program, ginpahayag ni Rodolfo Yap III, chairman sang Tour of the Fireflies – Iloilo, katuyu-an sang pagpatigayon sang nasambit nga aktibidad amo ang pag-angkon sang clean air kag sustainable community.
Suno kay Yap, ang “Tour of the Fireflies” ang nag-umpisa sang 1999 sa Luzon ilabi na sa Metro Manila kun sa diin nagatipon ang bikers kag nagapatigayon sang night biking samtang ang iban ang nagausksuk pa sang pakpak nga kasubong sang isa ka ipot-ipot.
Ginpahayag ni Yap nga nag-ugat ang nasambit nga aktibidad sa firefly ukon ipot-ipot sa diin ang presensya sang nasambit nga sapat ang palatandaan nga matinlo ang air kag water quality sang isa ka lugar.
Diri sa Iloilo, patigayunon ang “Tour of the Fireflies” sa Nobyembre 23 sa diin ang assembly area ang yara sa Iloilo Business Park kag magalibot sa distrito sang Jaro, La Paz, City Proper, Molo pabalik sa point of origin.
Ini ang bukas para sa tanan nga bicycle rider sa diin antes ang pagsugod ang aktibidad, may yara sang forum nga patigayunon sa diin mangin dinapit nga bisita ang tiglawas sang Department of Environment and Natural Resources.
Ang programa ang maga-umpisa 5:30 sa hapon kag pagkatapos sini, may yara sang igapanghatag nga snacks kag raffle draw para sa mga nagpakigbahin.
