Disyamado ang labor groups sa Western Visayas sa aprubado nga saka sa sweldo sang private sector kag domestic workers sa Western Visayas.
Sa interview sang Bombo Radyo kay Mr. Mario Andon, spokesperson sang United Labor-Western Visayas, iya ginpahayag nga nagpangayo sila sang P150 nga saka sa sweldo agud maka-recover sa pandemaya bangud sa naglala nga inflation sa rehiyon.
Apang P33 tubtob P40 para sa mga mamumugon nga nagatrabaho sa mga private establishments lang ang gin-aprubahan sang Regional Tripartite Wages and Productivity Board (RTWPB).
Suno kay Andon, ang P150 kuntani nga hingyo sa saka sa sweldo ang makapataas sa minimum daily wage nga P480 sa P630.
Ginpahayag man sang natungdan nga ang daily minimum wage sa subong nga P480 ang magaresulta sa P10,569 nga sweldo kada bulan para sa 22 ka adlaw nga pagtrabaho nga manubi sa poverty threshold nga P13,800 para sa isa ka pamilya nga may lima ka mga myembro.
