Apisar nga wala nadayun ang pagpresentar sang Prosecution team kay former Senator Antonio Trillanes IV sa nagapadayun nga impeachment trial batok kay Vice President Sara Duterte, wala man ini nakaluwas sa nangin komento ni Senator-Judge Ping Lacson.
Kasunod ini sang ginpatigayon nga press conference ni Trillanes sang Oktubre 2 kun sa diin ginplastar sini ang iya mga ebidensya batok sa Pamilya Duterte.
Didto man ginpahayag sang anay senador nga daw kaangay nga indi sya welcome sa senate impeachment court, ilabi na nga wala sya gin-isyuhan sang subpoena ni Presiding officer Chiz Escudero.
Paathag ni Lacson, indi lang ang presiding officer ang nagdesisyon agud indi anay pagdagdagan sang subpoena si Trillanes.
Dugang pa sang senador, maayo ang pag-research ni Trillanes sa iya nangin akusasyon sa Pamilya Duterte, apang importante sa gihapon suno sa iya ang evidentiary value ukon ang kabug-aton sang iya alegasyon kun magpungko ini sa impeachment court.
