Ginbaton na ni Senator Panfilo ‘Ping’ Lacson ang paathag ni former president Gloria Macapagal-Arroyo nga ginlagas siya kag ginkabig kriminal sa tion sang Arroyo Administration bangud sang impormasyon nga “ulihi lang nahibaluan nga sala.”
Suno kay Lacson, napatawad na niya si Arroyo.
“Late is always better than never. To ex-PGMA’s credit, she has the decency and courage to admit that she publicly and unjustly accused me of various crimes based on false information. Whatever, I have already forgiven her a long time ago,” suno kay Lacson. “For nine long years, under her regime, all that I had been hoping and praying for was to get back my dignity and honor,” pahayag pa sang presidential aspirant.
Una diri, sa iya recently launched memoir nga may titulo “Deus Ex Machina,” gin-ako sang anay presidente nga may nag-feed sa iya sang ‘false information’.
Ginapahayag nga kahimuan ini ni Antonio Luis Marquez aka Ador Mawanay.
Gin-link si Lacson sang 2001 sa nagkalain-lain nga criminal activities. Lakip sa mga akusasyon amo ang pagtago sang ginatos ka milyon nga dolyar sa foreign bank accounts nga gin-alegar ginkuha ni Lacson paagi sa iya involvement sa criminal activities sang siya pa ang nagpamuno sa Philippine National Police (PNP).
Suno kay Arroyo, ginkabig niya si Lacson nga kaaway sa baylo nga kaalyado bangud sa mga claims nga indi man “substantiated.” ##
