Nagpanawagan si former Senator Panfilo Lacson kay President Ferdinand Marcos Jr. nga gamiton ang iya line-item veto power sa ginratipikahan sang Kongreso nga 2025 budget bill.
Partikular nga ginplastar ni Lacson ang ginapahayag nga “unconstitutionality” sa budget cut para sa Department of Education (DepEd).
“Only the President can save the Constitution from becoming wastebasket-bound by exercising his line-item veto power once the Enrolled Bill lands on his desk,” suno kay Lacson.
Suno sa former senator, ang pagbuhin sang pondo sa DepEd ang nagalapas sa sa Article XIV Section 5(5) sang 1989 Constitution nga nagasaad nga dapat ihatag sang State ang pinakamataas nga budgetary priority sa education.
Wala man sini ginpalampas ang ginhimo sang bicameral conference committee nga pagbuhin sang budget sang DepEd panubo sa P737 billion apang ginpasakaan ang budget sang Department of Public Works and Highways (DPWH) sa P1.113 trillion.
Buot silingon sini, P12-billion gid ang ginkakas sa ginduso nga P748.6 billion funding para sa DepEd nga una naman nga gin-aprubahan kuntani sang Kamara. Magluwas diri, ginbuhinan man ang budget para sa Commission on Higher Education (CHED) kag state universities and colleges.
Una naman nga nagpabutyag sang kahangawa si former Senator kag subong Education Secretary Sonny Angara sa budget cut bangud kinahanglan ini kuntani suno sa iya para sa computers kag gadgets sang mga estudyante sa pampubliko nga mga eskwelahan.
Sang nagligad nga Miyerkules sang gin-aprubahan sang Bicameral conference committee ang committee report sa proposed P6.352 trillion national budget para sa 2025 kag una na nga ginpahayag nga pirmahan ni Marcos antes ang Paskuwa agud dalayon na ini nga mangin layi.
