Nag-init ang diskusyon sa social media sa tunga nanday Senador Alan Peter Cayetano kag Senador Panfilo “Ping” Lacson matapos ang mga alegasyon nahanungod sa SALN, mga manggad sang mga ini kag ginapahayag mga ghost project.
Nagsugod ini nga pagbaisay matapos gin-akusaran ni Cayetano si Lacson nga nagdoble ang net worth sang senador ukon ang kabug-usan sini nga manggad sa iya Statement of Assets, Liabilities, and Net Worth (SALN) sang 2025.
Gilayon naman nga ginpanginwala ni Lacson ang akusasyon kag ginpahayag nga may ara ini sang mga pribado nga negosyo nga amo ang isa sa mga rason sang pagdako sang iya manggad.
Ginsabat naman ni Lacson ang alegasyon ni Cayetano paagi sa pagpagwa sang isyu kay Cayetano nga may kaangtanan sa bilyones sini nga budget insertions.
Ginpanginwala naman ni Cayetano ang mga alegasyon ni Lacson nahanungod sa ginatawag nga ghost flood control project sa Taguig City kag suno pa sa iya nga kun gusto sini nga mag-imbestiga, dapat indi lang sa Taguig kun pati sa iban man.
Suno kay Cayetano dapat manabat ang bisan sin-o nga mapamatud-an nga may kaangtanan sa mga ilegal nga proyekto sa pungsod.
Sa pihak nga bahin, ginpahayag ni Lacson nga nagapangita na siya sang dugang nga impormasyon kag ebidensiya may kaangtanan sa gina-alegar nga mga ghost project sa Taguig City.
Suno sa senador, may ara siya sang mga informants kag testigo nga handa maghatag sang impormasyon nga mahimo magresulta sa pag-usisa ukon pagkaangot kay Cayetano sa nasambit nga anomaliya.
