Nahanas halin sa bata nga edad tubtub nagtapak sa kolehiyo si Gizelle Amour Tagabi, tumandok sang Tubungan, Iloilo, nga topnotcher sa March 2025 Licensure Examination for Professional Teachers.
Rank 5 si Tagabi sa pasinawan nga nakakuha sang rating nga 93.00%.
Sa interview sang Bombo Radyo Iloilo sa alumna sang West Visayas State University (WVSU) La Paz, iya ginpahayag nga pareho nga manunudlo ang iya mga ginikanan nga nangin daku man nga parte sang nangin preparasyon sa iya propesyon.
Ginkilala man sini ang nangin papel sang iya teachers halin sa Tubungan Central Elementary School, Tubungan National High School, tubtub sa College of Education sa WVSU.
“Lain gid tana basta West in teacher education,” pagdayaw sini sa buluthuan nga iya ginhalinan.
Pahayag pa ni Tagabi, nangin daku man nga bulig sa iya ang mga oportunidad nga nahatag sa iya bangud madamo siya sang ginpasakupan sa mga aktibidad sa eskwelahan.
“I learn everything I can, anywhere I can,” pahayag sini. “Ang mga naman-an from those experiences nag-accumulate gid kag amo gid to ang naka-help sa akon sa LET.”
Ginpakigbahin man sini nga ginkuha sini ang education bilang program sa college bangud na-inspire siya sa iya former teacher sa Senior High School. Magluwas diri, luyag man sini nga ma-explore pa ang iya napili nga major nga Social Studies.
Nahibaluan nga si Tagabi ang labing-una nga LET topnotcher halin sa Bachelor of Secondary Education major in Social Studies program sang unibersidad.
Summa Cum Laude siya sang nag-gradwar sang 2024 kag kilala man nga nagserbe anay bilang editor-in-chief sang official student publication sang College of Education. Nangin recipient man siya anay sang prestihiyoso nga IWAG Award sang Philippine Information Agency (PIA) nga amo ang nagakilala sang leadership, journalistic excellence, kag dedikasyon sang mga estudyante sa development communication.
Base sa Professional Regulation Commission, 191 ka licensed secondary teachers ang na-produce sang WVSU La Paz campus sa March 2025 board exam. Ginpatigayon ang pasinawan sang nagligad nga Marso 23 sa nagkalain-lain nga testing centers sa pungsod lakip na diri sa Iloilo.#
