Arestado ang isa ka lalaki bangud sa tuyo nga pag-hold up sa isa ka taxi driver sa Barangay Javellana, Jaro, Iloilo City.
Ang biktima amo si Joseph Alegado, 55 anyos, residente sang Sta. Barbara, Iloilo; samtang ang suspek amo si Mark Presidente, 30 anyos, residente sang Jaro, Iloilo City.
Sa interview sang Bombo Radyo sa taxi driver, iya ginpahayag nga naghalin ang lalaki sa GT Mall Pavia kag mapadul-ong sa Robinson’s Main sa City Proper.
Samtang naga-biyahe, gin-alegar nga namangkot ang suspek kon may GCash account ang driver. Wala sang GCash ang driver, gani nagsiling pa ang suspek kun pwede nga makahapit anay sa Javellana bangud mapa-laundry ini.
Samtang pakadto na sa Javellana, gin-alegar nga ginpugos sang lalaki ang driver kag nagdeklarar sang hold-up.
Nakakita sang kahigayunan ang driver gani naglumpat ini halin sa taxi samtang nagapangayo sang bulig.
Nagpalagyo naman ang suspek kag nabilin ang iya mga gamit sa sulod sang taxi, apang na-identify ini paagi sa closed circuit television footage.
Nakaagum sang mga gasgas sa kamot kag palanakit sa likod ang taxi driver bangud sang iya paglumpat halin sa nagadalagan nga taxi. Wala sang kuwarta ukon gamit nga nakuha ang suspek.
MAY REKORD SA POLICE STATION
Sa interview naman sang Bombo Radyo kay Police Major Eduardo Siacon Jr., hepe sang Iloilo City Police Station 9, iya ginpahayag nga gilayon nga nagresponde ang kapulisan kag gin-check ang CCTV footage sa lugar kasunod sang report nga ila nabaton.
Bangud kilala ang suspek, gilayon ini nadakpan sa iya balay sa Brgy. San Pedro, Jaro kag ginkumpirma man sang taxi driver ang pagkilal-an sini.
Suno sa pulis, may record nga alarm and scandal ang arestado kag ginapatihan man nga may kahilabtan ini sa illegal nga droga. Ginklaro sang pulis nga i-verify pa nila ini nga impormasyon.
Yara na ini subong sa kustodiya sang kapulisan kag magaatubang sang reklamo nga robbery hold-up. Nagpamalibad ini nga maghatag sang iya statement ukon mag-grant sang interview sa Bombo Radyo Iloilo.#
