CONCEPCION, ILOILO – Dakop ang lalaki matapos nga ginkawat ang P20,000 nga cash sa isa ka tyangge sa Concepcion, Iloilo.
Sa blotter report, nasaad nga ang suspek amo si Richard Ginon, 35 anyos kag residente sang Barangay Monica, Blumentritt, Iloilo City.
Sa interview sang Bombo Radyo kay Mayor Raul Banias, iya ginpahayag nga ang P20,000 ang inugbayad kuntani sang tag-iya sa mga ginpangumpra niya nga baligya.
Nakit-an mismo ang suspek sa Closed Circuit Television (CCTV) footage samtang ginakuha ang brown nga pouch sa tyangge kag nagsakay sa iya motorsiklo padulong sa area sang Sara, Iloilo.
Sa bulig sang Concepcion kag Sara Municipal Police Station, natigayon nga madakpan si Ginon sa Barangay Padios, Sara, Iloilo.
