ILOILO CITY-Arestado sa buybust operation ang ginakabig nga isa sa pinakadako nga ginabagsakan sang iligal nga druga sa Leganes, Iloilo.
Natigayon ang operasyon sa Brgy Guinobatan, Leganes.
Ang nadakpan amo si alyas Alog, 43-anyos, residente sa isa ka subdivision sa nasambit nga barangay.
Sa interview sang Bombo Radyo kay Police Captain John Robles, Officer in Charge sang Leganes Municipal Police Station, iya ginpahayag nga wala pa nakaagi preso ang subject apang base sa imbestigasyon, may yara sang nagahulog sang dako nga supply sang illegal drugs sa iya.
Suno kay Robles, indi pa mabuyagyag ang identity sang ginatumod nga nagabagsak sang dako nga supply sang illegal drugs.
Ginpahayag naman ni Robles nga ang mga kliyente sang subject ang nagapadulong sa iya balay kun sa diin sila nagabakal sang illegal drugs.
Posible man nga ginadul-ong mismo sang subject ang druga sa iya mga customer.
