Dakop ang isa ka lalaki sa ginpatigayon nga drug buy-bust operation sang Iloilo City Police Station 9 (ICPS9) sa Barangay Cubay, Jaro, Iloilo City.
Ang subject amo si Frank Salvador Sese, 41, single, driver, kag tumandok sang Las Piñas, Metro Manila kag temporaryo nga nagatenir sa nasambit nga Barangay.
Sa interview sang Bombo Radyo kay Police Major Eduardo Siacon Jr., hepe sang ICPS9, iya ginpahayag nga duha ka mga body-worn cameras ang gin-gamit sa tunga sang operasyon bilang kabahin sang transparency kag accountability sang kapulisan.
Suno kay Siacon, nakuha sa posisyon sang subject ang 5 gramos sang suspected shabu nga may Standard Drug Price nga Php 34,000.00 kag iban pa nga mga drug paraphernalia.
Sa subong, yara na sa kustodiya sang ICPS9 ang subject kag nagapangatubang sang kaso nga paglapas sa Republic Act 9165 ukon Comprehensive Dangerous Drugs Act of 2002.
