Mahilig ka bala magkaon sang madamo? Luyag mo bala masami nga magkaon sa mga eat all you can nga kalan-an?
Sa Germany, gin-ban ang isa ka triathlete nga si Jaroslav Bobrowski sa isa ka eat all you can sushi restaurant bangud sa pagkaon sang tuman ka damo sa diin ini ang ginakonsidera sang kalan-an nga indi normal kag indi maayo sa negosyo.
Nag-ugat ang pag-ban kay Bobrowski sa restaurant, sang nadesisyonan niya kaupod ang nobya sini nga magkaon sang eat all you can sa diin nagbayad siya sang 15.90 euros ukon P924 kada isa sa ila.
Nagtinir si Bobrowski sa restaurant sang isa ka oras kag tunga sa diin ginabanta 100 ka beses siya nga nagkuha sang sushi.
Ginkakibot na lamang sang triathlete nga ginpalapitan siya sang waiter kag ginhambalan nga indi na siya mahimo pa nga makabalik sa restaurant.
Paathag sang tag-iya sang restaurant, indi man niya kuntani luyag nga dumilian si Bobrowski apang kinahanglan niya ini himuon bangud mahimo nga wala na sang may mabilin pa nga sushi sa iban nga guest.
