INDIA – Malapit na lang ang eleksyon! Bilang botante, kinahanglan nga mangin mahinalungon kita sa pagpili sang atun nahamut-an nga kandidato.
Sa pungsod India, partikular sa Uttar Pradesh, aksidente nga nagsala ang 25 anyos nga Indian national sa pagboto sang kandidato sa nangin national election sang nasambit nga pungsod.
Bangud sa pagkadismaya, gin-utod ni Kumar ang iya ‘index finger’ukon tudlo bilang self-punishment sa pagboto sang indi niya luyag nga kandidato.
Suno kay Kumar, nabudlyan siya sa paghangop sang party symbols rason nga lain ang iya naboto.
Iya tuman nga ginhinulsulan ang pagboto sang indi nagakadapat nga kandidato.
Kaangay man sa atun diri sa pungsod Pilipinas, ginabutang sang inedible ink ang tudlo sang tagsa ka botante kun tapos na ini sa pagboto agud nga masiguro nga indi na ini makaboto pa liwat.
Gani, kamo mga ka Bombo, mangin maalam sa pagpili sang kandidato kag indi magpadala-dala sa kwarta sang mga pulitiko.
