Para sa kadam-an, ang kasal amo ang isa sa pinakamalipayon nga hitabo sa ila kabuhi.
Para naman ugaling sa iban, bisan ano pa ka daku ang preparasyon, ang kasal makabig nga “bangungot” ilabi na kun indi pa sila gusto magpangasawa ukon magpamana kag napilitan lang nga mag-upod sa isa ka tawo.
Abi mo sa mga drama lang ini nagakatabo?
Matuod ina, bangud amo ina ang mga hitabo nga ginhimo nga palangabuhian sang isa ka lalaki sa Espanya.
Matunog subong nga gina-istoryahan ining isa ka middle-aged nga lalaki nga si Ernesto.
Siya mismo ang nagbulgar sang iya trabaho nga amo kuno ang pagpang-guba sang kasal sang iban nga mga tawo.
Pahayag sini, ginabayaran siya sang 500 euros ($550) para nga kadtuan ang kasal sang iya kliyente, magpakuno-kuno nga siya ang lover sang kalaslon, kag magapalagyo sila palayo sa venue sang kasal.
Easy-peasy lang ini para sa iya bangud sugiran lang siya kuno sang oras, lugar, kag petsa, sigurado nga magatuhaw siya sa seremonya kag himuon sang pulido ang iya trabaho.
Gin-istorya sini nga daw lahog-lahog man lang sang una ang iya serbisyo, apang bangud may nagkagat kag nangin interesado diri, ginpadayon na lang niya ang pagpakuno-kuno.
Sa pagkamatuod suno kay Ernesto, fully-booked siya tubtub sa Nobyembre 2.
Ang 500 euros nga iya ginasukot sa kliyente ang wala pa nagalakip sa travel expenses.
Ginabayaran man siya sang extra para sa unexpected nga mga hitabo nga halimbawa, kun matampaan siya, masumbagan, ukon masipaan, ginabayaran siya sang dugang.
Kada tampa suno sa iya, may idugang man nga 50 euros ($55).
Bangud nabal-an sini nga kun mahinay ang iya hulag, mas naga-agresibo ang partner sang kliyente kag ginasakit siya, gin-ako sini nga may mga beses nga gina-hungod niya nga hinayon lang ang iya hulag para nga mapatup-an siya kag mas mabayaran sang daku.
