Lalaki ginbuno sang iya mismo nga abyan bangud sa binaisay sa Tubungan, Iloilo

TUBUNGAN, ILOILO – Ginbuno ang lalaki sang iya mismo nga abyan sa Barangay Lanag Norte , Tubungan Iloilo.

Ang biktima amo si Richard Tabaosares, 29 anyos kag ang abyan naman sini nga suspek amo si Domingo Eupan lunsay mga residente sang nasambit nga barangay.

Sa interview sang Bombo Radyo kay Police Captain Eleazar Climacosa , hepe sang Tubungan Municipal Police Station , iya ginpahayag nga hubog ang duha ka mga lalaki kag nagbinaisay.

Suno kay Climacosa, gilayon nga naakig si Eupan sa ila nga pagbaisay kag ginbuno si Tabaosares.

Dugang pa sang natungdan, igo sa dughan ang naangkon sang biktima kag gilayon nga gindala sa ospital agud madapatan sang nagakaigo nga pagbulong.

Sa subong, padayon pa nga ginapangita sang Tubungan PNP si Eupan.