At large sa gihapon ang apat ka mga suspek nga nagkastigo, naglabu kag nagbuno sa 22 anyos nga lalaki sa Barangay Cabayugan, Badiangan, Iloilo.
Ang biktima amo si Romar Barrientos, residente sang Barangay Sinuagan, Badiangan, Iloilo.
Ang mga suspek amo ang mag-utod nga sanday Eugene Loceño, 18 kag Edzel Loceño 20; kag ang magtiyo nga sanday DJ Zambra, 17 kag si John Zambra 20 anyos.
Sa interview sang Bombo Radyo kay PSSgt. Charlie Glenn Casador, imbestigador sang Badiangan Municipal Police Station, iya ginpahayag nga naga-drive sang motorsiklo ang biktima nga madul-ong kuntani sa iya nobya sa Barangay Cabayugan sa diin didto na ini ginlambatan sang apat ka mga suspek.
Nakita mismo sang nobya nga ginlabu ang biktima sang suspek nga si Eugene Laceño kag ginbuno ni DJ Zambra.
Suno kay Casador, nakaagi na away ang biktima kag ang suspek nga si Eugene bangud sa ginpahayag pagsuyaay.
Nakaagum sang madalom nga buno sa nawala nga bahin sang tiyan kag labo sa tu-o nga abaga ang biktima kag natalana nga ipaidalom sa operasyon sa Western Visayas Medical Center (WVMC).
Nagapadayon man ang pursuit operation sang mga otoridad.
Ginapreparar naman ang kaso nga frustrated murder batok sa apat ka mga suspek.
