Na-eksperyensyahan sang isa ka babaye nga literal nga bayaan sang iya nobyo.
Natabo ini sa indi kinaandan nga insidente sa San Mateo, Rizal sang nag-transact ang magkahagugma agud makabakal sang brand-new nga motorsiklo.
Suno kay Rizal Police Provincial Director Police Colonel Felope Maraggun, naghingyo ang suspek sa seller nga i-test drive sini ang motorsiklo apang ulihi na natalupangdan nga wala na ini nagbalik kag nagpalagyo na dala ang scooter nga nagabalor sang P215,000.
Ginbilin naman sini ang nobya nga sang amo nga tion, naga-istorya sa manugbaligya.
Nagtinguha pa ang seller nga kontakon ang suspek apang indi na ini malab-ot rason nga nagpakig-angot ang biktima sa mga pulis sa San Mateo.
Wala naman nagpamalibad ang nobya sang gindala ini sang mga pulis sa presuhan.
Panindugan sini, nakilala lamang niya ang lalaki sa online dating app kag wala siya sang hinalung-ong nga mahimo ini sang iya nobyo. Magluwas nga ginkawat sini ang motor, dala pa gid sini ang iPhone sang babaye.
“Wala po talaga akong kaalam-alam na ganun po yung gagawin niya sa motor. Actually, daladala niya po yung iPhone ko po. Natangay din po yun. Biktima din po ako,” pahayag sang girlfriend.
Padayon pa subong ang follow-up operations sang mga pulis agud maaresto ang suspek, samtang nagapabilin naman ang babaye sa kustodiya sang San Mateo Police Station.
“Sana mahanap ka na kasi ako yung nagbabayad ng kasalanan na di ko naman ginawa. Dapat ikaw yung nandito eh. Dapat ikaw yung nakakulong,” sukma sang babaye sa lalaki nga iya ginpatihan.
