Ginlampusan sang isa ka menor de edad ang isa ka lalaki sa Project 5, Brgy. Sooc, Arevalo, Iloilo City, Setyembre 21.
Ginkilala ang biktima kay Alyas “Emerson”, 20-anyos, kag residente sang Brgy. Airport, Mandurriao; samtang ginatudlo naman si Alyas “Bunoy” 17-anyos, bilang suspek nga lunsay residente mismo kun sa diin natabo ang krimen.
Sa nakuha nga impormasyon sang Bombo Radyo kag base man sa CCTV footage, ginhulat mismo ni Bunoy ang biktima sagwa sang computer shop kag didto na sini ginlagas kag ginlampusan si Emerson nga kaupod pa nga nagbakal sang whisky ang iya live-in partner.
Gintuyo pa sang biktima nga magbalus, apang nagdalagan na ini palagyo matapos liwat nga ginlagas sang suspek nga may ara na sang iban pa nga mga kaupdanan.
Matapos ang insidente, gilayon man nga gindala ang biktima sa ospital agud mahatagan sang nagakaigo nga pagbulong.
