ILOILO CITY- Siling nila, sa imo pagbiya sa kalibutan, indi mo gid madala ang imo manggad sa pihak nga kinabuhi.
Apang may isa ka lalaki sa Mexico nga nagdesisyon nga pamatud-an nga sala ang ginahambal sang kalabanan paagi sa paghingyo nga sa iya lubong, dal-on man ang iya precious truck.
Bangud sa iya pagpakig-away sa isa ka incurable disease, indi ma-enjoy ni Don Adán Arana sang Puerto San Carlos, sa Baja California Sur sa Mexico, ang iya pick-up truck nga ginregalo sa iya sang iya anak sang damlag lang.
Sa pagpati nga indi siya magdugay sa kalibutan, naghingyo si Arana sa iya pamilya na luyag niya nga ilubong upod sa iya salakyan, agud nga ma-drive niya ini sa pihak nga kinabuhi.
Nahibaluan nga sa Mexico, isa ka seryoso nga butang ang last wishes sang tagumatayon kag ini ang ginarespeto kag ginatuman gid sang pamilya sang napatay.
