Nanindugan ang suspek sa pagpangluthang-patay sa karelasyon sang iya live-in partner sa Barangay Purok 4, Pavia, Iloilo, nga self-defense lang ang iya ginhimo.
Ang suspek amo si Arnold Mamon, 41-anyos sang Barangay Cabugao Norte, Pavia kag isa ka utility worker.
Ang biktima amo si Joven Galvez Job, 35-anyos sang Barangay Sapal, San Lorenzo, Guimaras kag isa ka construction worker.
Natabo ang krimen sa salon nga ginatiniran ni Joylen Bayona Padernal, 39-anyos nga amo ang live-in partner sang suspek.
Sa interview sang Bombo Radyo kay Mamon, iya ginpahayag nga antes natabo ang krimen kahapon, Domingo, nakaistoryahanay na sila ni Job sang Sabado sa salon sang nag-abtanay sila nga duha kag didto ginpaandaman sang suspek ang biktima nga palayuan na ang iya live-in partner kag ang ila kabataan.
Si Job ang may yara man sang kabataan apang patay na ang iya asawa.
Suno sa suspek, kahapon, sang nagbalik ini salon, naabtan niya liwat nga yara pa ang lalaki rason nga ginkompronta niya ini kag sang liwat nga ginsukmaan niya si Job, namalibad ini nga palayuan si Padernal.
Pahayag ni Mamon, sa tunga sang ila pagkomprontahanay, didto nagtuyo nga magkuha sang kutsilyo si Job rason ng gin-gabot niya ang iya dala nga pusil kag gintiro ang biktima.
Nahibaluan nag 14 ka tuig ang relasyon ni Mamon kag Padernal kag sang nagligad lang nga Hunyo sang nagsugod nga wala na sila nagaupdanay bangud sa indi nila paghangpanay.
Gindugang naman ni Mamon nga nagakabalaka man siya nga may matabo nga indi maayo sa iya anak nga babaye bangud kun kaisa, nagakadto si Job nga hubog sa salon.
Gin-ako man sang suspek nga madugay na niya nga nahibaluan nga may iban nga karelasyon ang iya live-in partner.
Nasaksihan naman sang tatlo ka kabataan sang suspek ang krimen.
Preso subong ang suspek sa Pavia Municipal Police Station.
