ILOILO – Patay ang isa ka lalaki matapos ginluthang sa Brgy. Alibayog Sara, Iloilo.
Ang biktima amo si Ruel Aspera, 38, residente sang nasambit nga lugar.
Samtang ang duha ka suspek ang wala pa makilal-an.
Sa interview sang Bombo Radyo kay Police Major Jose Nemias Pamplona, sang Sara Municipal Police Station, iya ginpahayag nga yara sa sulod sang tyangge ang biktima sang ginsulod ini sang suspek kag gintiro sang makapila.
Suno kay Pamplona nga gilayon pa nga nagdalagan ang biktima sa karsada agud makapalagyo apang natumba ini kag ginsunod sa liwat sang suspek kag liwat nga gintiro agud mapuruhan.
Pahayag sang natungdan nga gilayon nakapalagyo ang suspek bangud may isa ini kaupod nga nagahulat sakay sa motor.
Ang biktima ang naka-angkon sang apat ka tiro sa kamot, likod kag ulo.
Madamo na sang rekord nga kaso ang biktima kag sa karon padayon sa pag-imbestiga ang kapulisan tuhoy sa mga suspek kag motibo.
