Ginsentensyahan ang isa ka lalaki sa Shanghai, China sang kapin tatlo ka tuig nga pagkabilanggo matapos napamatud-an nga sulit-sulit niya nga ginbutangan sang ginatawag nga “truth serum” ang ilimnon sang iya kaupod sa opisina agud mahibaluan ang mga plano sini sa trabaho.

Ang akusado nga ginkilala sa apelyido nga Li napamatud-an nga may sala nga “inducing drug use through deception.”

Nabakal ni Li ang “truth serum” sa isa ka business trip kun sa diin ginsiling sang nagbaligya nga bisan pila lang ka patak sini, bastante na agud mapasugid ang isa ka tawo sang ila tinago ukon mga sikreto.

Posible ayhan ina? Syempre, para mahibaluan, gin-try man ni Li!

Gingamit niya ini batok sa iya kaupod nga si Wang agud hibaluon ang mga plano sini sa trabaho.

Una niya ini ginhimo sang Agosto 2022, samtang nagkadto sila sa dinner sang iya mga kaupdanan. Ginpatakan niya ang ilimnon ni Wang sang serum.

Naka-eksperyensya si Wang sang pagkahilo kag kalain sang pamatyag, pero wala gihapon nakuha ni Li ang impormasyon nga ginapangita niya.

Ini ang rason nga ginhimo niya ini liwat sang Oktubre kag Nobyembre 2022 kag naglain liwat ang pamatyag ni Wang.

Diri na nagsugod nga magduda si Wang, bangud iya nakit-an nga nga kada upod niya si Li magkaon sa gwa, dira lang siya nagamasakit.

Nagdesisyon siya nga magpa-check sang dugo kag ihi.

Base sa resulta sang laboratory test, nagpositibo siya sa clonazepam kag xylazine nga makit-an man sa pampakalma nga apektado ang central nervous system.

Gamit ang nasambit nga ebidensya, nagpasaka si Wang sang reklamo sa pulis.

Ginsalakay sang mga otoridad ang balay ni Li kag nadakpan didto ang “truth serum” nga may sulod man sang amo nga mga droga. Dira na kag nag-ako si Li sa iya nga sala.

Sang ulihi, ginsentensyahan sang Shanghai District People’s Court si Li sang tatlo ka tuig kag tatlo ka bulan nga pagkabilanggo kag multa nga 10,000 yuan.

Bisan wala gindetalye kung ano ang eksakto nga work plan ni Wang, madamo ang nag-espekular online kon ano kadaku sang plano nga ini kag ano gid nga sikreto ang gusto sini mahibaluan kun ngaa nasarangan sini maghimo sang krimen.