ILOILO CITY- Ano mo bala ka palangga ang imo nga ido?
Ano ayhan ang imo mangin pamaagi nga pangitaon ang imo ido kun madula ini?
Sa Tucson, Arizona, isa ka lalaki ang desperado na nga makit-an ang iya ido nga chihuahua.
Si Eddie Collins nga amo ang tag-iya sang ido nga si Jenny, ang nagapangtapik sang mga posters sa mga pader sa Tucson kag nagabisita sa mga dog shelters agud nga makit-an ang iya pinalangga nga ido.
Apang bangud nga wala gid makit-an ni Eddie ang iya ido, na desisyonan niya nga maghatag sang padya sa makabalik sini.
Iya gin-anunsyar nga magahatag siya sang isa ka bedroom apartment kag duta kun makit-an na ang iya ido nga si Jenny.
Nagalaum si Eddie nga mabalik na sa iya nga luyo ang pinalangga niya nga ido.
Nagapangabay man siya sa mga tawo sa lugar nga buligan siya sa pagpangita kay Jenny.
Ginakabig na ni Eddie nga myembro na sang pamilya ang iya ido gani amo na lang ang iya pagkabalaka kun sa diin na ini.
Wala sang update kun nabalik gid man sa iya ang iya ido.
