Padayon pa nga ginapangita ang lalaki nga nagabisekleta, gintiro kag pwersahan ginsakay sa salakyan sang mga suspek sa Barangay Cabugao Sur, Pavia, Iloilo, pasado alas-6:00 kagab-i, Pebrero 23.
Sa imbestigasyon sang kapulisan, nakit-an sa CCTV Footage sa lugar nga nagasakay sa iya bisikleta ang biktma samtang ginasundan sang mga suspek gamit ang pribado nga salakyan nga ginalantaw pula ukon maroon ang duag.
Nabatian man sang isa ka witness sa lugar ang pagsinggit sang biktima sang tabang tubtob nakabati ini sang isa ka lupok sang pusil.
Sa interview sang Bombo Radyo kay Police Master Sergeant Luther Maderse, imbestigador sang Pavia Municipal Police Station, iya ginpahayag nga ila sa karun gina-monitor ang mga hospital sa syudad sang Iloilo kun may yara sang gindala nga isa ka persona nga biktima sang shooting incident.
Nahibaluan man nga padulong ang direksyon sang salakyan sa syudad sang Iloilo matapos ginkarga ang biktima.
Suno pa kay PMSg. Maderse, nakita man sa CCTV Footage ang pagpanaog sa salakyan sang duha ka lalaki nga suspek kag ginabulubanta yara sa 20 tubtob 30-anyos ang pang-edaron.
Samtang, sa separado naman nga interview sang Bombo Radyo kay Kagawad Jun sang nasambit nga barangay, iya ginpahayag nga ila na-identify ang bisikleta nga ginapanag-iyahan ni ”Alyas Mark” kag residente man sang amo nga barangay.
Suno pa sa iya, sa karon indi pa matumod kun siya gid man ang nagasakay sa bisikleta sang natabo ang insidente.
Pahayag pa sini, gintinguhaan sang pamilya ni alyas Mark nga kontakon ang cellphone sini apang indi ini ma-contact.
Sa karun, wala sa gihapon sang identity ang biktima kag ang mga suspek rason nga nagapadayon pa sa gihapon ang imbestigasyon sang mga otoridad.
