May isa ka tawo sa state sang Telangana sa India nga nakapukaw sang interes sang publiko bangud sa pinasahi sini nga ginhimo nga ginkilala sang Guinness World Record.
Ini amo si Kranthi Kumar Panikera nga napa-untat ang pagtiyog sang 57 ka electric fans sa sulod sang isa ka minuto gamit lamang ang iya nga dila!
Halos indi makapati ang tanan kun paano ini ginhimo ni Kranthi, apang matuod ini nga natabo bangud may video mismo ang Guinness nga naga-dokumento sang iya kadasigon kag daw kaangay nga wala ini sang sakit nga nabatyagan.
Antes ini nga record, kilala naman si Kranthi bilang si “Drill Man” bangud daring gid man ang iya stunts nga ginapakita sa publiko.
Mas nasemento pa gid ang iya reputasyon sa indi mapatihan nga performances bangud nakuha sini ang world record nga pinakadamo nga electric fan blades nga napauntat gamit ang dila sa sulod sang isa ka minuto.
May mga na-impress kay may ara man nga nakibot kag gintawag ini nga iron tongue. Interesado naman ang iban sa training ni Kranthi kag may mga curious naman kun paano sini ayhan bulngon ang iya dila.
May mga naga-kwestyon naman sini nga abilidad kag ginpamangkot ang Guinness kun ngaa ginakilala nila ang kaangay sini nga mga buluhaton.
Sa bahin ni Kranthi, ginsiling sini nga tuman ang iya kalipay sa iya record bangud nagdaku siya sa isa ka nabaw-ing nga lugar sa India kun sa diin feeling niya sang una, tuman gid ka daku kag kalayo ang paghandom para sa ila tanan.
Sa subong, uyat na sini ang world record nga siya pa lamang ang nakahimo.#
