Makahalam-ot ang isa ka hitabo sa Bursa, Turkey matapos 20 ka oras nag-upod sa search and rescue team ang isa ka lalaki agud magbulig sa pagpangita sa isa ka na-missing nga indibidwal.
Ulihe na natalupangdan sang rescue team nga ang lalaki nga naga-upod sa ila, amo man ang tawo nga ila ginapangita.
Suno sa mga otoridad, pila na ka adlaw nga ginapangita si Beyhan Mutlu matapos nga indi na ini ma-contact sang iya pamilya.
Ginapahayag nga nakigkita si Mutlu sa iya mga abyan, nakalab-ot sa kagulangan samtang yara sa impluwensya sang makahulubog nga ilimnon kag nag-upod sa rescue team nga nagapangita sang isa ka na-missing nga tawo.
Sang ginpamangkot ni Mutlu ang mga otoridad kun sin-o ang ila ginapangita, didto niya nahibal-an nga siya gali ang ila ginapinangita.
Matapos naghatag sang paathag sa mga otoridad, gilayon man nga gindul-ong ang lalaki sa ila nga balay.
