ILOILO CITY – Naghikog ang 27-anyos nga habal-habal driver sa Barangay Kipot, Janiuay, Iloilo bangud sa ginapahayag kapaslawan sa paghigugma.
Sa interview sang Bombo Radyo Iloilo, ginpahayag ni Police Chief Insp. John Paul Guay, hepe sang Janiuay Police Station, naabtan na lang nga nagabitay na ang biktima nga si Elerie Adorante, residente sang nasambit nga lugar, sa sulod sang kamalig malapit sa puluy-an sini.
Suno sa kapulisan, ginbatyag gid sang biktima ang pagpamatok sang ila mga ginikanan, sa relasyon nila sang 14-anyos nga kahagugma.
Ginpahayag ni C/Insp. Guay nga antis nasapwan nga wala na sang kabuhi, nag-inom pa ang biktima apang nagpabati-bati nga ma-suicide bangud sa kapaslawan sa paghigugma.
Apang wala naman nagapati ang pamilya ni Adorante nga ini ang nag-suicide.
Ipaidalom sang pamilya sa autopsy ang bangkay sang biktima agud mapat-od kun may foul play sa kamatayon sang ila himata.