ILOILO CITY- Naglumpat gikan sa atop sang overpass sa Luna St., Lapaz, Iloilo City ang isa ka lalaki nga ginapahayag may problema sa paminsaron.
Sa interview sang Bombo Radyo kay Staff Sergeant Romy Suatin sang Lapaz Police Station nga amo ang nagserbi nga negotiator samtang yara sa atop sang overpass ang lalaki, iya ginpahayag nga samtang ginaistorya niya ang lalaki, naghingyo ini nga tiruhon na lang siya bangud indi na niya luyag mabuhi.
Suno kay Suatin, gintuad sang lalaki nga taga-Mindanao ini kag may problema siya sa iya pamilya rason nga luyag nalang niya nga mapatay.
Samtang ginanegosyar ni Suatin ang lalaki, gindayon gid sini ang paglumpat sa diin una nga nagtupa sa semento ang iya tiil.
Gilayon naman nga gindala sa ospital ang lalake matapos nga nabali ang iya tiil kag nagdugo ang iya baba.
Suno naman kay Leo Patingga, nagadrive ini sang motorsiklo sang nakita niya ang lalaki sa atop sang overpass.
Ginsinggitan niya ini kag ginlingaw-lingaw tubtob nga nakaabot ang mga pulis.
Pahayag niya, ginpilit man nila nga papanaugon apang lalaki apang wala gid ini nagpamati.
