Wala gid siguro sang tawo nga may luyag nga magtinir sa presuhan bangud lugar ini nga ginadingot sa imo ang imo kahilwayan.
Well, except siguro sa isa ka lalaki didto sa Italya nga nag-presentar mismo sang iya kaugalingon nga presuhon siya bangud natak-an ini sa iya nga asawa sa ila nga balay!
Nagapuyo ini nga 30 anyos nga Albanian nga lalaki sa Guidonia Montecelio.
Naka-house arrest ini bangud sa iya kahilabtanan sa iligal nga droga.
Suno sa otoridad, may nabilin pa nga pila ka tuig antes matapos ang house arrest sa amo nga lalaki.
Isa ka adlaw, nakibot na lang ang mga tawo sa police barracks bangud gulpi nga nagpakita ini nga lalaki kag nagpakitluoy nga isaylo na lang siya sa presuhan.
Rason sang lalaki, daw impyerno na ang iya nga kabuhi kun upod niya ang iya asawa sa puluy-an kag indi na gid siya makabatas.
Bangud sang natabo, gin-aresto matuod ang lalaki bangud sa iya paglapas sa house arrest rules.
Ginmandu man sang judicial authorities nga sayluhon siya sa presuhan.
