COLOMBIA – Atensyon sa mga tawo nga manugtunto!
Isa ka lalaki sa Colombia ang nangin viral sa social media matapos nga hublas ini nga nagahapa sa atop sang salakyan bilang silot bangud sa pagtunto sa iya nga asawa.
Ang lalaki ang gin-parada sa palibot sang Barranquilla, Colombia.
Ginapasuni nga nadakpan mismo sang asawa ang iya bana nga may ka-hulid nga iban nga babayi sa isa ka motel.
Nagpakitluoy man ang lalaki sa iya asawa nga pasaylohon na lamang ini.
Apang bangud sa kaakig, ginmanduan sang babaye ang iya bana nga agud mapatawad niya ini, kianhanglan niya atubangon ang silot.
Nagsugot man ang lalaki nga maghublas kag maghapa sa ibabaw sang salakyan samtang nagapauli sila sa ila balay nagikan sa motel.
Makit-an sa video nga ginatinguhaan sang lalaki nga matabonan ang iya nawong gamit ang tuwalya nga iya ginakaptan.
Nakit-an naman sang mga otoridad ang lalaki kag gindakop bangud sa iya kabastosan nga ginhimo.
Gilayon naman nga nakaguwa sa presohan ang lalaki bangud nakabayad ini sang pyansa.
Sa subong, malipayon na ang lalaki sa luyo sa gihapon sang iya nga asawa apisar ginpakahuy-an siya sa madamo nga tawo.
Gani sa mga kalalakihan dira, indi gid pagtuntuhon ang inyo nobya ukon misis bangud mahimo nga ini man ang mahimo ninyo nga madangatan.
