Sigurado ka man bala kun sin-o nga mga tawo ang nagaulikid sa imo –patay ka man ukon buhi?
Amo man ini ang pamangkot sang isa ka 60-anyos nga lalaki sa Brazil nga sa tuman niya ka curious kun sanday sin-o ayhan ang magakadto kun mapatay siya, nahimo niya nga peke-on ang iya kamatayon!
Ginpahayag nga isa ka ceremonialist ang lalaki nga si Baltazar Lemos. Isa siya ka master of ceremonies sa lain-lain nga mga event; gani sa tion nga may mga haya, nakakita na siya nga kun kaisa duha lang ang nagakadto, kag kun kaisa naman nagaginutok ang mga tawo.
Amo ini ang nagpukaw sa iya kuryosidad nga mahibaluan kun pila ayhan ang makadto sa haya kun siya na ang yara sa lungon.
Ang natabo… nag-post ini nga nagapahibalo sa iya pamilya kag mga abyan nga napatay na siya, kag may picture pa sang Albert Einstein Hospital sa Sao Paolo.
Bangud gin-anunsyo man kun diin nga chapel ihaya ang bangkay, nagkadto man didto ang iya nga mga kapartidusan kag mga abyan.
Sang didto na, gin-play ang isa ka voice record kun sa diin mismo tingog ni Baltazar ang nagapanugid sang iya nga mga inagyan sa kabuhi.
Nagtodo pa gid ang mga hibi sang mga tawo bangud abi nila, gin-preparar na ini sang lalaki antes pa man siya ginbawian sang kabuhi.
Apang sa kakibot sang tanan, gulpi lang nga nagbukas ang altar doors kag nagsulod si Baltazar!
May iban nga nagwawaw, samtang may iban naman nga daw nakakita sang ghost, kag may yara man nga indi makahulag.
Sunod nga ginpaathag sang lalaki nga curious lang siya kun sanday sin-o ang magakadto sa haya rason nga nahimo niya ini.
Nanginit naman ang mga tawo sa iya rason kag sa attempt sini nga kuhaon ang atensyon sang tanan.
Mas nagdugang pa gid ang bash sa iya sang nahibaluan sang publiko nga may yara siya sang 80-anyos nga iloy nga naka-wheelchair nga amo gid posible ang pinaka-naapektuhan kun nabatian sini ang balita.
Nag-sorry man si Baltazar apang daw kaangay nga mga bungol ang mga tawo sa iya palibot umpisa sang amo nga adlaw. ##
