Makabig nga ikaduha na nga kabuhi ang naangkon sang isa ka lalaki matapos ginluthang sang riding-in tandem sa Tacas, Jaro Iloilo City.
Ang biktima amo si Rodolfo Melicado, 36 kag tumandok sang isa ka banwa sa Iloilo.
Sa interview sang Bombo Radyo kay Pol Lt. Col. Reuben Siason, hepe sang Jaro Police Station, iya ginpahayag nga las 6:00 sang hapon samtang nagabantay si Melicado sang iya baligyaan nga kawayan sang may nagpondo nga pula nga motorsiklo sakay ang duha ka mga suspek nga lunsay nakasuksok sang helmet.
Suno kay Siason, nakit-an gilayon sang biktima ang paghana sang armas-luthang sang isa sa duha ka suspek sa motorsiklo gani nakahapa ini kag nakalikaw sa bala.
Sa panaysayon ni Melicado suno sa pulis, naangot na siya sa isa ka shooting incident sang tuig 2013 apang ini ang dugay na nga nasolbar.
Gintuad man suno sa iya sang biktima nga ang iya upod sa shooting incident sadto ang ginluthang sang nagligad lamang nga tuig.
Ini ang ginalantaw rason ni Melicado kun ngaa ginatuyo man siya nga patyon.
Dugang pa ni Siason, nagapadayon pa ang ila nga imbestigasyon sa diin usisaon man ang tanan nga closed circuit television (CCTV) cameras sa lugar nga gintabuan sang krimen agud matumod ang identity sang mga suspek.
