Kun magsulod gani ang kawatan sa isa ka establisyemento, madasig ang iya hulag para nga indi na siya maabtan sang mga tawo sa palibot.
Apang lain pa gid ang natabo sa isa ka suspek nga nakasulod na sa iya target nga lugar, apang napurnada pa kag nadakpan pa sang pulis.
Ang rason? Abaw, nawili siya abi sa pagbasa.
Isa ka 38-anyos nga lalaki ang suspek nga nagsulod sa apartment sa Prati district sa Rome paagi sa balcony.
Sang ara na siya sa sulod sang hulot, nakit-an sini ang isa ka lamesa nga may nakatungtong nga libro kaangot sa Greek mythology. Ang title sini amo ang The Gods of Six O’clock nga ginsulat sang Italian author nga si Giovanni Nucci.
Bangud may hulag kag kalas sa apartment, nakabugtaw ang 71-anyos nga homeowner kag nadakpan sini ang lalaki nga nagatutok sa pagbasa sang libro.
Nagtuyo pa ini nga makapalagyo apang nakatawag na ang homeowner sa pulis.
Nag-rason pa ang lalaki nga nagsaka siya sa building para magbisita sa iya abyan, apang nagpinsar siya nga nagtupa siya sa B&B [bed &breakfast], nakakita sang libro, kag gin-umpisahan niya sa pagbasa.
Indi man ugaling mapatihan ang lalaki bangud nakit-an sa iya dala ang mga malahalon nga gamit nga ginkawat man sini sa lain pa gid nga balay antes siya nadakpan.
Sang nabatian naman sang book author ang balita, naham-ot pa ini kag nagpromisa nga hatagan niya sang libro ang suspek. Nakuha pa sini nga i-angot ang suspek sa Greek mythology book. Suno sa author nga si Nucci, ang iya paborito nga Greek god amo si Hermes nga amo man ang ginakilala nga god of thieves — pareho sa sirkumstansya kun sa diin nadakpan ang lalaki.#
