Nasapwan nga wala na sang kabuhi ang isa ka lalaki sa sulod sang iya ginatiniran nga boardinghouse sa Zone 5, La Paz, Iloilo City.
Ginkilala ang nasapwan kay Melvin Taboon, ginabulubanta naga-edad sang 40-anyos, kag residente sang Negros Occidental.
Sa interview sang Bombo Radyo kay Ann, boardmate sang biktima, iya ginpahayag nga wala na nakaguwa si Taboon sa iya kwarto sa sulod sang tatlo na ka adlaw.
Nabatyagan na lang sini ang mabaho halin sa kwarto sang lalaki rason nga iya ini gintawag apang wala na ini nakasabat.
Gilayon naman nga gin-report sa Punong Barangay ni Ann ang natabo agud ini ipa-check.
Sang ginbuksan ang kwarto, nakit-an ang lawas sang lalaki nga nagahabok na.
Suno sa inisyal nga obserbasyon, wala sang nakita nga pilas sa iya lawas.
Base man sa pagpangusisa sang Bombo Radyo sa ginatrabahuhan sang lalaki, naga-obra ini sa isa ka tinapayan sa La Paz kag apat ka adlaw pa lamang nga naga-duty.
Sa interview naman sang Bombo Radyo kay Edgar Monter, katrabaho sang lalaki, iya ginpahayag nga naka-istorya si Taboon nga sa nauna sini nga trabaho, may ara sang wala pag-intindihanay sa management sini.
Suno pa sa iya nga nagbaisay sila sang iya supervisor sa nauna sini nga trabaho sa Miagao, Iloilo bilang isa man ka panadero.
Dugang pa niya, duha ka adlaw na nga wala nagreport si Taboon sa trabaho rason nga nagduda sila nga may natabo nga malain diri.
Gilayon man nila nga gin-check ini sa iya ginatiniran nga boarding house kag ato na kag nahibal-an nila nga wala na gali ini nakaguwa sa iya kwarto kag bangkay na ini sang nasapwan
Suno pa sa iya mga kaupdanan, ila ginpahayag nga basi ginbatyag sini ang kalain sang buot sa iya nauna nga trabaho kag gina-alegar nga na-cardiac-arrest ini.
Padayon sa karon ang imbestigasyon sang mga otoridad agud mahibaluan ang matuod nga natabo.
