𝗜𝗟𝗢𝗜𝗟𝗢 𝗖𝗜𝗧𝗬 — Nasapwan nga nagalutaw-lutaw kag wala na sang kabuhi ang isa ka lalaki sa Iloilo Esplanade subong nga adlaw.
Sa interview sang Bombo Radyo kay Boboy Apinan, Auxiliary sang Philippine Coast Guard Iloilo, iya ginpahayag nga may nabaton sila nga report kaangot sa insidente nga gilayon man nila nga ginpadulungan sakay sa ila nga speed boat.
Suno kay Apinan, matig-a pa ang lawas sang biktima, sa diin, ginabanta nga wala pa sang 19 ka oras sugod sang ginbawian ini sang kabuhi.
Ginpahayag man sini nga posible nga hubog ukon nalipong ang biktima rason nga nahulog ini sa esplanade.
Apang santo sa paglantaw sini sa lawas sang biktima, wala siya sang may nakita nga ano man nga pilas nga naga patimaan nga wala ginsakit uko ginpwersa antes mapatay.
Ginlaragway man sini nga kalbo, matambok, may suksok nga short, kag ginabanta nga yara sa 60-anyos pasaka ang edad sang biktima.
Nagpanawagan naman ang natungdan sa publiko kun kakilala nila ang biktima ukon may mga himata sila nga nadula.
Sa subong, yara sa Philippine Red Cross ang lawas sang nasapwan nga lalaki sa Esplanade.
